Articles

የአደራ ቃል

ተቀርጾ የቀረ ከልቤ ላይ
ሰርጾ ገብቶ የማይታይ
ክብረት ያለው ታላቅ ሲሳይ

የአባት ህልሙ እንዲፈፀም
ሻማ አብርቶ ተንበርክኮ የሚፀልይ

እንደ ሰዓት ጊዜ ቆጥሮ የሚደውል
የሚቁላላ እንደ ምግብ የሚበስል
ወተት ሆኖ የሚረጋ የሚመስል
የቆሞሱ የአባታችን የሆነ ቃል
ሄዶ ሄዶ ቆምኩኝ ይላል
ተስፋ ሳይቆርጥ ተመልሶ ይቀጥላል
የኸው እስከ ዛሬ ይናገራል
ኪሊል…. ኪሊልል…. ኪሊልል
እንደ ስልኩ ያንቃጭላል ይደውላል
አዎ! የአደራ ቃል

በትዝታ ስናያቸው
እንዲህ ነበር ገጽታቸው
እንዲህ ነበር ተግባራቸው

በክህነት አለባበስ በዚያ አባት ቁመና ከመቅደሱ ይቆማሉ
አሃዱ አብ ሊሉ

ፈጣሪ ሲመሰገን ሲጠሩ መላዕክት
ነብያት ሐዋሪያት
ስትወደስ የብርሃን እናት

ወንጌል ሲነበብ ብሉይ ከሐዲስ
አቤት እግዚኦ ማረነ ክርስቶስ

ፀናፅሉ ሲወዛወዝ ይታየኛል
ቅዱስ ዕጣን ይሸተኛል
ታምረ ማሪያም ይሰማኛል

ይኸ ነበር ተለምዷችን ሰንበት ሰንበት
በኦርቶዶክስ ሥርዓት ቆሞሱን ማየት
በወንጌል ትምህርት ድምፃቸውን መስማት
ዓይኔ ዛሬ ምን ነክቶታል
የልማዱን ማየት ተስኖታል
ጆሮስ ምነው? ምን ሆነሃል
የአባት ድምጹ የአባት ቃሉ ርቆሃል

ስንቱ ሕፃን ተጠመቀ በቆሞሱ
ስንቱ ታዳጊ ስንቱ አዋቂ ቆርቦ ነበር በቆሞሱ
አስከሬንም ተሸኝቷል እስቲ አስታውሱ

የአብርሃም የሣራ ብለው ቀድሰዋል
ሙሽሮችን በአባትነት መርቀዋል
እመጫቱን በየቤቱ ጠይቀዋል
ፀበሉንም ረጭተዋል
እስረኛንም አፅናንተዋል
ሁሉን እነዳመሉ አስተናግደው
ቁጭ ብድግ ብለው
የአባት ወጉን አሳይተው አስተምረው
ካህናት አፍርተው አብዝተው
አዲስ ትውልድ አደቁነው
ኢትዮጵያዊ ሙሴ ሆነው

ተፋቀሩ ይቅር ተባባሉ
ሥጋ ወደሙ ተቀበሉ
ቤተ ክርስቲያንን አገልግሉ

ነበረ ምክራቸው የዘወትር ቃላቸው ትዝ የሚለኝ ከሰማሁት
እናንተም የማትረሱት
የታሪክ ቅርስ የምታደርጉት
ኦርቶዶክስን የምታወርሱበት
ወንጌል የምትማሩበት የምታስተምሩበት
ፈጣሪን የምታወድሱበት
ድንግልን የምትማፀኑበት
በረከት የምታገኙበት
ደስታ ሃዘን የምታስተናግዱበት
የእኛ ነው የምትሉት
መቅደሱን ሥሩላት
ልጆቼ! ይብቃን ይህ የኪራይ ቤት
ነበር ያሉት ደግመው ደጋግመው ያሳሰቡት
ለሁላችን ያደራ ቃል የሰጡት
ልብ ያለው ልብ ይበለው
ትዝታው የቅርብ ነው
የቴፑን ቅዳሴ በእውን የቀየሩ
ታቦት አምጥተው ከመቅደስ ያኖሩ
ፍቅርን አቀብለው ፀብን ያባረሩ
የሁላችን አባት
መስቀል ይዘው ሻማ ያበሩ
የአደራ ቃል ለእኛ ትተው እሳቸው ሄደዋል
ዳግም ላናያቸው ርቀዋል
ሩጫውን በድል ጨርሰዋል
ሩጫውን በድል ተወጥተዋል
መንግስተ ሰማይ ያውርስልን
ጌታ በቀኝ ያቁምልን
የእሳቸው ረድኤት አይለየን
እኛንም የአደራቸው ቃል ፈፃሚ ያድርገን

ወስብሃት ለእግዚአብሔር!
አዘጋጅና አቅራቢ ጌታሁን ዘውዴ ወ/ኪሮስ

Download it from Here

ያደረግነው ማተብ

ቀናቶች ተቆጥረው እንደየጾታችን
ያኔ ገና! ገና ያኔ! በአርባ እና ሰማንያ በጨቅላ ዕድሜያችን
መሠረት የጣልነው ለዛሬው እምነታችን
ጣታችንን ለሰው ማተብ ከጌታችን

ዋጋ የተከፈለለት ደም የፈሰሰለት
ፀጋውና ፍቅሩ ማተብ ያረፈበት
ከአምላካችን ጋራ ከእመብርሃን ጋራ የተሳሰርንበት
በስሙ ኦርቶዶክስ፤ ክርሰቲያን ተብለን የተሰየምንበት

በጨቅላነት ዕድሜ ያደረግነው ማተብ
እስከአሁን ለኖርነው ሆኖልናል ቀለብ

በተወለድንበት በአደግንበት አገር
እንደየ አጥቢያችን በቀረበን ደብር
ማተቡን አድርገን ማስቀደስ ስንጀምር
ቃሉን እየሰማን ስንማር ስንዘምር

ገጠርም ይሁን ከተማ ለኖርነው
በድህነት ይሁን በድሎት ላደግነው
ጌታችንም ያው ማተቡም አንድ ነው
ከእኛ የሚፈለገው ልባችን ማፅናት ነው

የሕይወት ጉዞአችንን ዛሬ ላይ ለማድረስ ብዙ አታግሎናል
በአየርና ባሕር ስንት አገር ደርሰናል፤ ስንት አገር ዓይተናል
በእግራችንም ቢሆን ድንበር ተሻግረናል
መከራና ችግር በሽታውም ቢሆን ተፈራርቆብናል
የማተቡ ኃይል ግን ሁሉንም አስችሎ ጠብቆ ይዞናል

በጨቅላነት ዕድሜ ያደረግነው ማተብ
እስከአሁን ለኖርነው ሆኖልናል ቀለብ፤

ከእኛ ሕጻናቶች ምስጋናችን ይድረስ ለአንተ ለፈጣሪ
ወደአንተ እንድንመጣ ለአደረከው ጥሪ

ታላላቆቻችን እንዳይከለክሉን ስላደረክልን
አቅመቢስ ሆነን ጉልበት ስለሆንከን
በኮልታፋ አንደበት እግዚአብሔር ተመስገን
ወጣቶች ከሆነው ! እግዚአብሔር ተመስገን

ቀድሞ ስለመራን መልካሙን ጎዳና
እሱን እንድናምን አድርጎናልና
ቤቱ እየመጣን እንድናገለግል
ጉልበቱን ከጤና አብዝቶ ሰጥቶናል
እግዚአብሔር ይመስገን ለዚህ አድርሶናል

ጐልማሳ ለሆነው ሰዓቱን ጠብቆ ሁሉን ስለሰጠን
በትዳር መኖሩን ፤ ዘር መተካቱን
የሥራ ዕውቀቱን እንዲሁም ሹመቱን
ለወገን መቆርቆር ቤተሰብ መርዳቱን
እግዚአብሔር ለዚህ ስላበቃን
አዛውንት ስለሆን ! ይመስገን ! ተመስገን!

አልፋና ኦሜጋ ህያው እግዚአብሔር
ለዚህ ላበቃኸን ለንስሐ ክብር
የዕድሜ ባለጸጋ ላደረከን በምድር
ለታሪክም ቢሆን ሆነናል ምስክር

በጨቅላነት ዕድሜ ያደረግነው ማተብ
እስከአሁን ለኖርነው ሆኖልናል ቀለብ

የማርያምን ቤቷን ለመሥራት ብላችሁ
እስከዛሬ ድረስ በተባረከ እጅ ዳቦ የጋገራችሁ ቆሎ የቆላችሁ
በሰከነ ሙያ ሻይና ቡናውን ያፈላችሁ እንጀራና ወጡን ያበሳሰላችሁ
በመልካም ሁኔታ ያስተናገዳችሁ

በልዩ ችሎታ ጠላውን ጠምቃችው ጠጁን የጣላችሁ
በበዓል ዝግጅት ትኬቱን ቲ_ሸርቱን ጫማውና ልብሱን
ለስላሳና ውኃ,,,,,,ሌላም ሌላም ሌላም በመሸጥ ገቢ ላስገኛችሁ

በጥሬዉም ቢሆን ገንዘብ የሰጣችሁ
ልዪ ልዪ ነገር ስጦታ ያመጣችሁ
በጉልበትም ሳይቀር ጽዳት ላፀዳችሁ
ሙዳዩ ምፅዋት ጥላ ላዞራችሁ
በቲያትር ድራማ ለተሳተፋችሁ

በኮሚቴ ሥራ ጊዜ ለሰዋችሁ
ከቅጽራችን ውጪ በአገር ልጆች መሃል በተለያየ ጊዜ ድንኳኑን ተክላችሁ
ኆኅተ ሰማይን ምሰሶ አርጋችሁ
ከጠዋት አንስቶ እዚያው የዋላችሁ
በደጀን በመሆን ድጋፍ የሰጣችሁ
በመግዛትም ቢሆን የተባበራችሁ

ማተቡ ነውና ለዚህ ያበቃችሁ
የብርሃን እናት በረከቱን ሁሉ አብዝታ ትስጣችሁ
የልባችሁን መሻት ትፈጽምላችሁ

ከዚህ በተለየ! የቆሙሱን ተግባር ውርስ የወረሳችው
ሥርዓት እንዳይጐል ስላደረጋችሁ
እንድንባረክም አባቶች ጋብዛችሁ
በአዘኑም ቦታ እየተገኛችሁ
መጽናናት እንዲኖር ስላደረጋችሁ
የታመመውንም በመጠየቃችሁ
በደስታውም ቦታ ትምህርት የሰጣችሁ
አባቶች ዲያቆናት በሁሉም ሥፍራ ላይ ያገለገላችሁ
ጤናና ዕድሜውን ጽናትና ብርታት አንድዬ ይስጣችሁ

ወስብሀት ለእግዚአብሔር!
አዘጋጅና አቅራቢ ጌታሁን ዘውዴ ወ/ኪሮስ

Download it from here

የምሕረት ቃል ኪዳን የተሰጠሽ እናት

መንጦላዕተ ብርሃን መንበረ ስብሃት
ወላዲተ አምላክ ቅድስት ወብፅዕት
በምሕረትሽ ጎብኝን ኪዳነምሕረት

በተሰጣት ኪዳን ቃል በገባላት
አማልዳ ስታስምር በጣም ፈጣን ናት
የፍጥረት አማላጅ የአንድዬ እናት

ፈጥና ትደርሳለች ከልብ ካመኗት
መዓዛ ፍስሃ ማህደረ መለኮት
በዓሏ ሲከበር በዛሬዋ ዕለት

ለኛም እንድትደርስ ነይ ነይ እንበላት
ጎዶሎ ህይወት ነው እሷ የሌለችበት

የተዋህዶ ልጆች የምንመካብሽ
ጸጋና በረከት የምናገኝብሽ
የወርቅ መሰላል ዕጸ መድሃኒት ነሽ

የወይን ሐረግ ነሽ የህይወት መሰላል
በዕምነቱ የጸና በምልጃሽ ይድናል

በምልጃሽ እንድንድን ለዓለም መጽናኛ
ከአምላክ የተሰጠሽ የሰው ልጅ መዳኛ
የጭንቅ አማላጇ እንደ በላየ ሰብ ድረሽልን ለኛ

ቃላቶች ያጥሩኛል ስለ አንቺ ስናገር
የዓለሙ መድህን ነሽና ማህደር

የዓለም ቤዛ ነው የማህጸንሽ ፍሬ
ክብርሽን አልዘልቅም ዘርዝሬ ዘርዝሬ

ልጅሽ መድሃኒት ነው እሱ አይሳሳትም
ከኛ ይጎድላል እንጂ ከሱ ጎድሎ አያውቅም

በዓለም ስንጓዝ ቢገጥመን ፈተና
በቤቱ እንድንኖር ፍጹም እንድንጸና
ንስሃን ሰጥቶናል መሀሪ ነውና

መስገድ ይገባናል መጸለይ በትጋት
ከቤቱ እንዳንወጣ እስከ ዕለተ ሞት

አነሳሽ እግዚአብሔር ፈጻሚም እሱ ነው
አልፋና ወሜጋ ምስጋና ይድረሰው

ወስብሃት ለእግዚአብሔር!
አዘጋጅና አቅራቢ ስንዱ ተድላ

Download it from here

መልካም ሰርቶ ማለፍ

ከየት ተነስቼ ከየት ልጨርሰው
የትኛውን ጽፌ የቱንስ ልተወው
እንደ እግዚአብሔር ፈቃድ እስቲ ልጀምረው

አባ ወልደ መስቀል በህይወት ዘመናቸው
ቅዱስ፣ ቅዱስ ብለው እንደአባቶቻቸው
ለነፍሳቸው ያደሩ ታላቅ አባት ናቸው
ለነፍሳቸው ያደሩ ሐዋርያም ናቸው
ለምንድነው ሞት ሁሌ አዲስ የሚሆነው
በተራ እንደምንሄድ ከቶ እያወቅነው

ይመስለኛል ሞትማ አዲስ የሚሆነው
እንደ እኔ በሃጢያት ለወደቅነው
በንስሃ ታጥበን ላልተዘጋጀነው
ዛሬም ነገም ሁሌም አዲስ ነው

አባታችንማ ሆነው ይታዩኛል የመድሃኔዓለም ሙሽራ
በስውር የሰሩት ታላቁ ስራቸው በሰው ፊት አበራ

እኔ በራሴ ወስኛለሁ አላለቅስም በእውነት
እኚህ ክቡር ቅዱስ ለሆኑ አባት
በዚህ ቀን እሞታለሁ አላሉ አባቶች በተሰበሰቡበት
ስራቸውን ሊገልጽ መድህነ ዓለም የኛ አባት
ይህ ሁሉ ምስክር ነው ለኛ ለቆምነው በህይወት

እኛም ልጆቻቸው በዚህ ዘመን
የአባታችንን አደራ ተቀብለን
ህልም የሆነባቸውን መስቀሉን አቁመን
በንስሀ ታጥበን ለክብሩ እንዲያበቃን
የፍቅር ባለቤት ክርስቶስን ይዘን
ስለሌላው ሃጢያት መወንጀሉን ትተን
መጾም መጸለዩ ያ ነው የሚጠቅመን
ሁሉ ከንቱ ከንቱ ስራችን ብቻ ነው እኛን የሚያድነን

ሐዋርያው ጳውሎስ ሩጫዬን ጨረስኩ እንዳለው
ከልጅነት እስከመጨረሻው ምዕራፍ ለሃይማኖት ቆመው
አንድ ሁኑ ይቅር ተባባሉ ሲሉ መልዕክት አስተላልፈው
እረፍታቸው በተክልዬ ገዳም ሆነ ሩጫቸውን ጨርሰው

የዘመኑ ሰማዕትነት አባቶች እንደሚሉት
ራስን መሆን ነው ክርስቲያንነት
እንዳንወድቅ እንድንጸና በሃይማኖት
ጸሎትና ጸጋቸው አይለየን የአባታችን በረከት
ወስብሃት ለእግዚአብሔር!
አዘጋጅና አቅራቢ ስንዱ ተድላ

Download it from here

የአባ ወልደመስቀል አለብን አደራ

አምላክ በቸርነት በፈቀደው ዕለት
በህብረት አሰባስቦን ስንጀምር ፀሎት
ሁላችን አስታውሰን ያንን የመከራ የችግሩን ሰዓት

ማለፉ ደስ ብሎን ክበር ንገስ አልነው የአለምን መድሃኒት
እዚህ አድርሰውናል እንዳባቶቻችን ተጋድለው በእውነት
እንጸልያለን በደካማ አንደበት እንዳይለዩ ፍጡነ ረድኤት

እዚህ ስንመጣ ወደእግዚአብሔር ቤት
የተሰበረ ልብ ይዘን ባንድነት
እንጹም እንጸልይ እስቲ እንወቅበት
አይቀር መጠራቱ ተራ አለን ሁላችን እንሄዳለን ድንገት

ምን ይሆን ስንቃችን የሠራነው ሥራ
ለምታልፍ ዓለም ለበስባሽ ስጋችን ስንሮጥ እንደአሞራ
ለነብስ የምንለው ምን አቆይተናል ኋላ ስንጠራ

ክርስቲያን ወገኔ እስቲ አሁን እንንቃ ዛሬ እንመካከር
እርግፍ አድርገን ትተን ጥላቻ ቅያሜ እርስ በርስ መናቆር
እናስታውሰው ጌታ ያስተማረንን ወርዶ ወደምድር
ምንም አንጎዳ እስቲ እንከተለው እንኑር በፍቅር
በምድር ብቻ ሳይሆን በሰማያዊው ቤት ይሆነናል ክብር

በአምላካችን አምሳል ተፈጥረን በአርአያው
ክብሩን እንድንወርስ አድርጎን ህያው

አባታዊ ፍቅሩን ማጣጣም አቅቶን
ከአለሙ ተባብረን ሃጤአታችን ከብዶን
የጥፋት ደመና አንዣቦብን ሳለን
አርነት አወጣን ፍቅሩን አለበሰን

ታምነን እንሰማራ በእምነት ጎዳና
ከቤቱ እንመገብ ሰማያዊ መና

ብርሃናችንን በሰው ፊት እናብራ
በመንገዱ እንገዝ መልካም ፍሬ እናፍራ
የድንግል ማርያምን ቤቷን እንድሰራ
የአባ ወልደመስቀል አለብን አደራ

የፍጥረቱን እዳ በደሉን ሊሽከም
ቀራንዮ ዋለ ሃያል መድሃኒዓለም
እናስተውል ሰዎች የተዋለልንን
ከሞት እንድንድን አምላክ የሰጠንን

ምክንያት ሳንደረድር ሳናበዛ ሰበብ
ንስሃ እንግባና ወደማእዱ እንቅረብ

ሂዱና አስተምሩ ብሎ እንደላካቸው ጌታ ሃዋርያትን
ምሳሌ ሆነዋል በስደት አገር ላይ እኝህ አባታችን

አባት የሌለው ልጅ ዲቃላ እንዳንባል
በትምህርት መልሰው ሙሉ አድርገውናል

አባ አባታችን አምላክ በቸርነት የለገሳቸው ሃብት
ትዕግስት ማስተዋልን ልብሳቸው አርገዋት
በረዶውን አልፈው አዚህ አደረሱን በእግዚአብሄር ቸርነት

ሰለጠንን ብለን እየሰየጠንን አባትን መዳፈር መናገር አምጥተን
ያንን ሁሉ ታግሶ አምላክ በቸርነት ለዚህ አደረሰን

እዛች ቅድስት አገር ጸበሏን ሲጠጡ
እንጸልያለን ድነው እንዲመጡ

አባ ወልደመስቀል ትጉህ አባታችን የሃይማኖት መሪ
ድነው ያገናኘን ቸርነቱ አያልቅም ሃያል ነው ፈጣሪ

አነሳሽ እግዚአብሄር ፈጻሚም እሱ ነው
አልፋና ኦሜጋ ምስጋና ይድረሰው
ወስብሃት ለእግዚአብሔር!
አዘጋጅና አቅራቢ ስንዱ ተድላ

Download it from here

በቤቱ እንድንኖር ምርጫችን አንድ ይሁን

ምን ይሆን ዓላማው ምን ይሆን ግባችን
የክርስትና ህይወት የኛ መንገዳችን
ልቤ ተነክቶብኝ በጣም አዘንኩና
ብዕሬን አነሳሁ በስመ አብ አልኩና

ካህናት መምህራን ዘወትር ሲያስተምሩን
ህይወት የሆነውን ወንጌል ሲመግቡን
ውሃና እሳቱ ለይተው ሲነግሩን
በሳት መቃጠሉን እንዴትስ መረጥን

እራሱ ክርስቶስ ለኛ ያስተማረን
ለፍቅር መገዛት መተው ቂም በቀልን
ምን የቀረው አለ ለኛ የያልሆነልን

መንገዱ መልካም ነው የክርስትና ህይወት
በንስሃ ታጥበን ለስጋ ወደሙ ስንቀርብ በአንድነት
መምጫውን ስለማናውቅ ያ የማይቀረው ሞት
የዓለም ጣጣ አያልቅም ተዉ እንጨነቅ ለሰማያዊው ቤት

ኧረ የፍቅር ያለህ ፍቅር ጠፋ ወገን
መጨካከን በዛ ቀረ መተዛዘን
ጥንተ ጥላታችን በምድር ላይ ሲያናጥር
እርስ በርስ ሲያባላን ፍፁም ሳንጠረጥር
በሰዎች ጥላቻ በሰዎች ቅያሜ ከቤቱ ስንቀር
መንገዱን ስተናል ያላንዳች ጥርጥር

ባንድ ልብ እንጸልይ ቤተ እግዚአብሔር መጥተን
ኤሎሄ ይቅር በለን ሰላም ስጠን እያልን

ንጹህ ልብን ይዘን ከመጥን በፍቅር
የጥበብ ባለቤት ይሆናል ከኛ ጋር

ህሊናን ሰብስበን ጥቂት ብናስበው
ከሃይማኖት በላይ ሀብታችን ምንድነው

ቢከፋን ብናዝን የምንጸልይበት
የሃጢያትን ሰንኮፍ የምናወልቅበት
የክርስትናን ጣዕም የምንለይበት
በአርባ እና ሰማኒያ የተጠምቅንበት
በወላጆች እቅፍ መጥተን ያደግንበት
ቤቷን ብንሰራ ሆነን በአንድነት
የተዋህዶ ልጆች ስለምንከብርበት
ጸጋና በረከት ስለምናገኝበት
በምግባር እንጠንክር እንጽና በእምነት

ወስብሃት ለእግዚአብሔር!
አዘጋጅና አቅራቢ ስንዱ ተድላ

Download it from here

ሰላም ለኪ ማሪያም

ዓለም ዘቅጦ ወርዶ ተዳፍኖ ጨልሞ
ዓይኑ እያየ ታውሮ በራሱ ወጥመድ መራመድ አቅቶት ተዳክሞ

ተዝለፍልፎ ሲንገዳገድ ተሸንፎ
በእምነት ማጣት ባዶ ሆኖ ቀፎ

ትንቢት ሲደርስ ሲገጣጠም ሳይታይ ወረደለት
ሳይታሰብ ተፀነሰ ለደከመው ሊሆን ጉልበት

ከሰውነት ሥጋ አላብሰሽ ከደም ደም አዋርሰሽ
ለእኛ ስትይ መንገድ ሆነሸ
አሳልፎ እሱን ሰጥቶ ለእኛ አረገሽ
ይጠልቃል ይረቃል ይህ ሁሉ ሚስጥርሽ
ሰላም ለኪ ማሪያም ለክብርሽ
ሰላም ለኪ ድንግል ለፍቅርሽ

ሰላም ለኪ ኪዳነምኅረት
የንጽሕና ቅድስና መሠረት

የጽድቅ አክሊል የወርቅ ሙዳይ
አምሣያ የሌለሽ ከፍጥረታት በላይ
የሰማይ በር አምባ መጠጊያ ሆይ
በደሌን ትተሽው አድርጊኝ አገልጋይ

በዚያ በብርድ በግርግም ውስጥ የወለድሽው
እርጒም ሄሮድስ ሊያጠፋብሽ ሲያስፈልገው
ስደት ገብተሽ መከራውን ተቀብለሽ ያሳለፍሽው
አምላክ ሆኖ ጡት አጥብተሽ እንደ ሰው ልጅ ያሳደግሽው
በጐልጐታ ስትፀልዪ ስትማልጅው
እያነባሽ የልብሽን የነገርሽው

ልጄ ወዳጄ ሆይ! ጌታዬና አምላኬ
የምሻውን ሁሉ ትፈፅምልኝ ዘንድ፤ እጠይቃለሁኝ ይኸው ተንበርክኬ

መንገዱ እንዲሰፋ የሰው ልጅ መዳኛ
ስሜ ድልድይ ይሁን ካንተ መገናኛ

ቃል ኪዳን ግባልኝ ልቤም ደስ ይበላት
የጠፋችውን ዓለም መልሰህ አብጃት
እናቴ ሆይ አላት

ዘወትር ስንቅ አድርጐ ስምሽን ለሚጠራ
በንጹህ ኀሊና ቤትሽን ለሚሠራ
ስለ ማሪያም ሲባል ዕኩል ያካፈለ ከነዳያን ጋራ
ማሰብ አያሻውም ተዘጋጅቶለታል የፃድቃኖች ሥፍራ

በስምሽ ለሚያምን በዓልሽን ለሚያከብር
ቆሞ ላስቀደሰ አሽብሽቦ ለሚዘምር
ውዳሴ ተአምርሽን ገልጾ ለሚያስተምር
በእውነተኛው ቦታ ያገኘዋል ክብር

የተራበ አብልቶ ያጠጣ የጠማውን
አዝኖ ያለበሰ የተራቆተውን

ያዘነውን ሁሉ አፅናንቶ ያረጋጋ
ታማሚ እስረኛን ሲጠይቅ የተጋ
ተከፍቶ ያገኛል የሰማይ ቤት ዋጋ

የልቡንም መሻት ለአንቺ የነገረ
ምስልሽን በአንገቱ በቤቱ ያኖረ
ፀበልሽን የጠጣ ገብቶ የተነከረ
ሕይወቱ ፈውስ ነው በጣሙን ያማረ

ሰላም ለኪ ማሪያም ለክብርሽ
ሰላም ለኪ ድንግል ለፍቅርሽ

ሰላም ለኪ ኪዳነምኀረት
የንጽሕና ቅድስና መሠረት

በልጅሽ ቃልኪዳን መዳን እየቻልኩኝ
በሥምሽ ኋይል ብቻ ታምር እያየሁኝ
ምሥጋና ለማቅረብ ምነው ተሸነፍኵኝ
እመቤቴ ዳብሺኝ ዓይኔን ግለጪልኝ

ከሰይጣን ፍላጻ ከወጥመዱ እንድድን
አፋፍ ላይ ነኝና ዘርጊልኝ እጅሽን
ካላንቺ እርዳታ የለም እኮ መዳን
ግልፅ አርጐ ያስረዳል የልጅሽ ቃልኪዳን

ወስብሃት ለእግዚአብሔር!
ለየካቲት ኪነምኅረት ዓመታዊ በዓል ተዘጋጅቶ የቀረበ
አዘጋጅና አቅራቢ ጌታሁን ዘውዴ ወ/ኪሮስ

Download it from here

የነበርን ዓይተናል

የነበርን ዓይተናል ያልነበርን ሰምተናል
ቃልኪዳን ተከብሮ ታቦት አንግሰናል
የአባታችን ጸሎት በረከት ሆኖናል
የአባታችን ድካም ሰላምን ሰጥቶናል

ኦ! ማሪያም የአማኑአል እናት
የኪዳን ሕግ ጽላት
መስላለ መውጫ መንግሥተ ስማያት
ፍቅርን አልብስሽን ተነሳን ለጸሎት

ኅብረቀለም ምልክት እንዲሆንሽ
አምላክ ቃሉን አስተካክሎ አኖረልሽ
የሕይወት ፈውስ እንዲሆነው ለሚጠራሽ
በአባቱ በራሱ በመንፈስ ቅዱስ ስም ቃልኪዳን ገባልሽ

ማሪያም ብሎ ላከበረ ለዘከረ
ኃጥህ ሆኖ በላየስብ ለነበረ
በኪዳንሽ ነፃ ሆነ ሚዛን ደፋ ተቀየረ
እንደቃሉ እውነት ሆነ ፤ በእምነት መሰከረ

ከያሉበት መጡ ምዕመን ካህናት በቫንኮቨር ምድር
በኒውዌስት ሠፈር
በኆኀተ ስማይ ቅጽር
በኦርቶዶክስ ሥርዓት በዓልሽን ለማክበር

ቪክቶሪያ፤ ሲያትል፤ ላስቬጋስ፤ ሁሉም ተባበረ
ካህናት ምዕመን በዝቶልን ነበረ
የቆሙሱ ጸሎት መልሱ ተጀመረ
ፍቅርን ከኅብረት ጋር መሠረት አኖረ

አባቶች አስተማሩ ጠቃቅስው ወንጌሉን
አማኑኤል ለእናቱ ቃል የገባውን
የምሕረት መንገድ ጥርጊያውን
ጥንት የተጀመረ አሁንም ያለውን

የነበርን አይተናል ያልነበርን ሰምተናል
ቃልኪዳን ተከብሮ ታቦት አንግስናል
የአባታችን ጸሎት በረከት ሆኖናል
የአባታችን ድካም ስላምን ሰጥቶናል
በዕለተ ስንበት ቅዳሴው ሲቀደስ
በደመቀ ሁኔታ ተስጥዎ ሲመለሰ
የተሰበረ ልብ ምዕላውን ሲያደርስ
ማመልከቻው ሄደ እመንበሩ ድረሰ

አብሳሪሽ ገብርኤል ፤ ጠባቂሽ ሚካኤል
በፍጥነት ተገኙ አንቺን ለማገልገል
በመዝሙር በወረብ አድምቀው ውለዋል
አንድ ሁኑ እያሉ ፍቅርን ጋብዘውናል

ያልተነካ የለም የሁሉም ስሜቱ
እንዲያ ደምቆ ሲታይ ዐውደ=ምኀረቱ
ሁሉም ለበጎ ነው መሐረነ አቤቱ
ነገም ይደገማል እንደቸርነቱ

ደፋ ቀና ሲሉ እናቶች በጓዳ
ሰንበት ት/ቤት ሲያስተናግድ እንግዳ
ስበካ ጉባዔ ሁሉን ሲያስተባብር
ምእመን እንግዳ ሲስተናገድ በክብር
ቦታ አልበቃ ብሎ ማሳረፊያ ወንበር
አንተ ቅደም፤ አንቺ ቁጭ በይ ፤ እኔ ልቅር
ዓይተናል ደስ የሚል የኪዳኗ ፍቅር
ደስ የሚል የክርስቲያን ተግባር

ፈቃዱ ሆነና ታቦቱን ለማንገስ እኔም ስለነበርኩ
በዓይኔ በብረቱ ለማየትም ታደልኩ
ከደስታዬም ብዛት ምኞቴንም ቀጠልኩ
ምስሉንም እያየሁ ከልቤ ተማጸንኩ

ቸሩ ፈጣሪ ሆይ ! አቅሙ ስለሌለን
ለረጅም ዓመታት በኪራይ ቤት አለን
ስንዘምር በፍራቻ ድምጽ እየቀነስን
ስናከብርህ ተሳቀን ፤ ሥናነግስህ ተጨናንቀን
ከዚህ ሁሉ ችግር በቃችሁ በለን
አቤቱ ተለመነን!
እንደ ዳዊት ሳይሆን እንደ ሰለሞን ሆነን
ቅዱሱ ቤትህን ለማነጽ አብቃን
እንደ በደላችን ሳይሆን እንደ ቸርነትህ ይሁን
አሜን!

ወስብሀት ለእግዚአብሔር!
አዘጋጅና አቅራቢ ጌታሁን ዘውዴ ወ/ኪሮስ

Download it from here